Conversation with a Sanitary Napkin

Mahal na kita ngayon pa lang

kahit mga mata mo'y di ko

pa naaaninag o narinig

ang tinig mong sa tingin ko'y

matinis din tulad ng akin.

Ngayon pa lang ay mahal na kita

kahit pa nga ba ika'y isang

hibla pa lamang ng hiningang

pinagpalitan sa isang saradong silid

kung saa'y ang pawis at hininga'y

nagniniig upang maging isa.

Mahal na kita subalit pipiliin

kong ika'y maging hininga muna,

maging dugong di magkakaron

ng munting mga mata o ng tinig na

tulad ng sa akin.

Madami pa akong nais gawin at

mga bagay na gustong aralin.

'Di pa handa anng aking mga

tula o ang mga oyaying aawitin

sa tabi ng duyan o kuna.

Paghahandaan ko muna ang

mga tanong na iyong itatanong

ang mga aral na aking itatanim.

Ihahanda ko muna ang aking sarili

dahil sa ngayon, di ko pa kayang

mabuhay nang para sa iba.

Ngunit nais kong sabihin

sa dugong aking palalayain:

Ngayon pa lang ay mahal na kita.

August 3, 2004