Going Global

Isa akong maskarang nagkukubli
Sa isa pa uling maskara.
Ang pangalan ko'y hiram lamang
Sa dating sinta ng aking ama
At sa mahal kong lola
Apelyido ko'y bandera ng aking ama
Ang aking ari ay ari na ng iba.

Isa akong hanginng nakikihalubilo
Sa mga tulad ko ring hangin.
Mga mata'y nakakubli
Sa mga talukap na walang identidad,
Mga dila'y nilalamon ng gahaman na labi.

Isa akong maskarang namumuhay
Sa daigdig na walang mukha
Ang lahat ay pawang hindi iyo
At hindi rin kanya
(lalo pang hindi akin...
paano maaangkin ang isang bagay
na hindi masalat, malasahan, o maamoy?)

Namumuhay ako sa mundo ng karamihan
Ang mga ideya'y parang mga batong
Tinatadyakan at hindi makita ang
Angking kaibahan.

Isa akong maskarang natatabingan
Ng isa pa muling maskara
Namumuhay sa daigdig
Ng mga walang mukha.

august 16, 2004